بعد الخمس سنوات

بلاش العقاب اللى يكسر ولادنا

 

بلاش العقاب اللى يكسر ولادنا

“اللي إتكسر يتصلح”

مقولة بنقولها في أي موقف مش عارفين فيه نبرر الغلط اللي عملناه، بس حتى لو “اللي اتكسر يتصلح” دي مشيت في كل المواقف مش هتنفع خالص مع ولادنا. لو كسرنا فيهم حاجة ممكن جدا مانعرفش نرجعها ودا في رأيي يبقي عبط إن إحنا اللي نأذي عيالنا، كفاية الدنيا عليهم مش هنبقي إحنا كمان!

كتير أوي مننا دا لو ماكناش كلنا بنتعصب علي عيالنا لكن لازم تبقوا عارفين إن العصبية الزيادة بتدمر شخصيتهم وبتضعفهم حتي قدام نفسهم وبتعودهم علي الإهانة  وتحمل الأذي النفسي وممكن في أعمار معينة تشجعهم يغلطوا بره البيت أو ينجرفوا ورا صديق سوء و دا لأن إحنا كسرنا رابط المحبة والمودة اللي بيننا وبينهم. أعرف كتير ناس متعلمة بتضرب عيالها جامد، أنا جيراني في العمارة بيضربوا ولادهم (أولاد في سن المراهقة) لدرجة إني بسمع صوت الضرب وصوت الولاد وهما بيعيطوا. إيه دا! دا الحيوانات مش بتعمل كده مع عيالها، أنا بحس إن الأهالي دي كان أحسن لها ماتجيبش ولاد لأن دول شباب بنفسية متدمرة هيتطلعوا للدنيا ناقمين علي الحياة وهيكونوا شخصيات غير سوية في المجتمع.

أنا أم عصبية و ساعات بتعصب جدا بس من يوم ما خلفت لحد النهارده أنا بحاول كل يوم أبقي أهدي وأحسن مع ولادي. لسه شغالة علي نفسي بس بتحسن. نفسيتي بتتعب لدرجة العياط لما بتعصب عليهم، بحس إني ما استاهلهمش بس بوعد نفسي إني مش هعمل كدا تاني. فمش عارفة ولا قادرة أتخيل اللي بيضربوا بوحشية دول إزاي كدا. أنا عارفة إنه موضوع شائك بس لازم تبقي عارفة إنه يوم ما تفقدي شعورك كدا علي ولادك إنتي بتخسريهم بكل ما تحمله الكلمة من معني. خسارة نفسية بينك وبينهم وخسارة في نفسيتهم هما غالبا مش بتتصلح.

بلاش تبرري لنفسك ليه بتفقدي شعورك ولا ليه بتضربي جامد كده. التبرير أول غلطة! مفيش حاجة تبرر القسوة بس فيه مليون حاجة تعاقبي بيها غير الضرب. العقوبات اللي مسموحة و مفيهاش مشكلة هنتكلم عليها بعدين بس دلوقتي خدي قرار إنه أنا وجوزي لازم نحافظ علي ولادنا ونوقف الضرب أو العصبية المبالغ فيها

Facebook Comments

ديانا فريد

ديانا هي زوجة وأم لطفل توأم مستوحاة من الموسيقى والطبيعة والتفاعلات اليومية في الحياة. تستخدم شغفها بالكتابة لالتقاط اللحظات الخاصة واستبدال الضحك بالألم وإلهام الآخرين. كاتبة طويلة في العديد من المنشورات في مصر والخليج. من خلال Twin Mummy’s Diary تشارك أفكارها وخبراتها ونصائح مفيدة أثناء انتقالها نحن من خلال ركوب الأفعوانية تسمى الأمومة ، مع تحدياتها وأفراحها.

زر الذهاب إلى الأعلى