بعد الخمس سنوات

الطفل السوبر اللى ماحصلش!

 

الطفل السوبر اللى ماحصلش!

كل الأمهات طول الوقت كأنهم ماشيين بألة حاسبة: مصاريف المدرسة، الدروس، التدريبات، كامب شتوى، كامب صيفى، خروجات و كل دا على أمل إن الطفل يكتسب مهارات ويطلع الطفل السوبر اللى ما حصلش

وأكبر إحباط بتقابله الأم إن مودى إبنها بعد دا كله طفل عاااااااااادى جدا بعد كل المجهود والفلووووووس دى

الحقيقة إن معظم الأمهات بيعملوا نفس السيناريو وبالتالى ما بقاش فيه تميز ولا إختلاف بين الأطفال كلهم بقوا زى الإنسان الآلى بيقولوا نفس الكلام  وبيعملوا نفس الحاجات بدون وعى ولا تمييز

خلونا نتخيل بعد كل المصاريف دى ولفك ودورانك وسهرك فى البرد على حمام السباحة وقعادك بالساعات بره السنتر عشان مدرس المدرسة يحفظ مودى وأصحابه الإمتحان عشان يقفلوا الإمتحان تانى يوم وتدور الأيام وتعدى وكلهم يتخرجوا بيعملوا نفس الحاجات ومتبرمجين بنفس الخبرات اللى ما شافوش غيرها فى حياتهم

ياترى هيكون إيه مستقبلهم فى سوق العمل ؟؟؟؟؟
هتكون إيه الميزة اللى ممكن تكون فى كل واحد فيهم ساعتها؟

يا خساااارة الفلوس ويا خسارة أكتر على العمر اللى ضاع

الأحسن نسيب أولادنا بطبيعتهم يعنى يذاكروا بمجهودهم مش بدروس التقوية اللى عاملة زى أدوية نفخ العضلات فى الجيم.

نسيبهم يجربوا ويقعدوا فى البيت يخترعوا ويتفاعلوا مع إخواتهم ويحسوا بحناننا وعطفنا ويشوفوا عينينا وإحنا بنكلمهم.

يرسموا، يلونوا، يعملوا خيمة بملاية، يفكوا ويركبوا، يروحوا النادى علشان لعب بحرية بدون تقيد بالعجلة وفرقة الكورة وأطفال تجرى ورا بعض فى التراك.

وفى رحلة إنطلاقه هيعرف شغفه فين ودورنا ساعتها ننميه ونطوره
وفى النهاية هو دا الطفل اللى بيطلع لاعب كورة مشهور زى محمد صلاح وعالم زى د.زويل

الطفل زى العصفور فى إنطلاقه وخبرته فى حياته بياخدها من الطيران بحرية مش بوجوده فى قفص حتى لو من دهب.

إحسبيها صح

Facebook Comments

ريهام سمير

ريهام سمير مستشارة مهنية في التعلم وتنمية المهارات الشخصية. ريهام أخصائية معتمدة في عسر القراءة من مركز بلاكفورد – لندن وعضو في جمعية عسر القراءة البريطانية. وهي مُعلمة معتمدة للانضباط الإيجابي في الفصل الدراسي من الرابطة الدولية للانضباط الإيجابي في الولايات المتحدة الأمريكية ، ومُنسِّقة معتمدة في اللغة الإنجليزية في TEFL وممارس معتمد في البرمجة اللغوية العصبية من المجلس الأمريكي للغة البرمجة اللغوية العصبية. تطبق ريهام تقنيات التعلم والتعليم الخصوصية الأكثر تقدمًا لخدمة أنواع عديدة من العملاء من مختلف الأعمار والأنظمة التعليمية.

زر الذهاب إلى الأعلى