البطاطس المهروسة
التحفة الفنية اللى قدامكوا دى من اكتر الحاجات اللى معظمنا بيحب ياكلها مع الاكل وبالذات الاستيك….
البطاطس المهروسة … او Mashed Potatoes زى مابنقول
مشكلة البطاطس الازلية مع الدايت ان البطاطساية الوسط فيها حوالى 170 سعر حرارى… وبصراحة مش بتشبع خالص لو كلناها هى بس كنشويات مع الاكل… طب نعمل ايييييييييييييه؟؟؟؟
نعمل الماش بتاعتنا اللى بنحبها بس بتحايل شوية… بدل مانهرسها لوحدها… نهرس معاها حاجة مايكونش فيها سعرات كتير…. القرنبيط!!!! ومش هتصدقوا الطعم لما تعملوها انه حقيقى اكثر من رائع والمفاجأة ان راس القرنبيط الصغيرة على بعضها كدة مافيهاش اكتر من 70 سعرة حرارية… ولاحاجة
المقادير: (لشخصين)
• بطاطساية وسط متقطعة مكعبات
• راس قرنبيط صغيرة متفصصة الوردات بتاعتها
• ملح وفلفل
• نصف كوب حليب خالى الدسم
• معلقة شاى زبدة
• عودين بصل اخضر متقطع رفيع الجزء الاخضر منه بس (او توم مفروم لو مش عايزين بصل)
• اختيارى: خضروات ورقية حسب الرغبة
الطريقة:
• نحط البطاطس تتسلق عادى
• فوق حلة البطاطس نحط مصفى على مقاس الحلة ونحط فيها القرنبيط يستوى على البخار (اتنين فى واحد)
• اول مايستووا… نهرسهم مع بعض مع الزبدة واللبن والملح والفلفل ولو عايزين تحطوا اى بهارات تانية زى ماتحبوا..
• وبعدين نقلب معاهم البصل الاخضر او التوم… ولو عايزين اى خضار تانى زى ماتحبوا.. بقدونس.. شبت.. روزمارى… زى مانتوا عايزين..
الطبق ده نصيب الفرد فيه حوالى 150 سعر حرارى …
وبالف هنا
مع انها صيدلانية… الا ان اكتر حاجة بتحبها إيمان حلمى هى انها تطبخ اكلات كتيرة من الاكلات المفضلة عندنا بطريقة تكون ماشية مع الدايت وف نفس الوقت تحافظ على الطعم الحلو… ومن ساعتها قررت تشارك الفكرة دى مع كل الناس اللى نفسهم يعملوا دايت ومايزهقوش.. من خلال اكلات جديدة ولذيذة… ودايت!
