الامتحانات مع الصيام
الامتحانات شغالة الفترة دى في مراحل التعليم المختلفة والقلق الأكبر دايما بيكون من نصيب ولادنا في الثانوية العامة.
حاجات كتير بتقلقنا كلنا كأولياء أمور زى شدة الحر وصعوبة ظروف اللجان فى الجو ده و زاد علينا الكام سنة دول الامتحانات مع الصيام.
الولاد محتاجين الذهن الحاضر والتركيز ومحتاجين ينجزوا الامتحان في الوقت المحدد وعلشان نساعدهم مهم أوي نهتم بأكلهم في فترة الامتحانات.
أول شيء نهتم بيه هو وجبة السحور واللي بنصح انها تكون بدري مش قبل النوم علي طول علشان نضمن نوم هادى لولادنا.
البروتين مهم جدا في وجبة السحور وكل الوجبات يعنى ننوع ما بين الفول والبيض والحمص والعدس وكل أنواع البقول مع الحرص علي تجنبها في حالة القولون العصبي.
.البيض ننوع فيه مع الخضروات المختلفة ونحضره بسمنة بلدي أو زيت زيتون مع التقليل من العيش والمعجنات واللى هيساعدهن علي تركيز أفضل وشبع لمده أطول
والنصيحة الذهبية هي شرب سموثي قبل النوم وده لتجنب العطش وإعطاء الجسم جرعة غذاء سائلة.
نركز في السموثي علي الكوسة واللى هنستخدمها نية ومتلجة وكمان ممكن نستخدم الموز والكيوي والأناناس والكانتلوب ونقدر ننوع زي ما نحب.
المهم ما ننساش نضيف معلقة أو اتنين من حبوب الشيا أو حبوب القرع عسل – لب و نسكر المشروب بتاعنا إذا احتجنا بالعسل أو التمر ونخلطه بالماء مش باللبن.
وطبعا ما نغفلش أهمية النوم وتمارين التنفس.
ربنا يوفق كل الأولاد والبنات في الامتحانات ويكتبلهم النجاح والتوفيق.
هبة أنور ، أم لثلاثة أطفال ، هي مدربة صحية شاملة درست التغذية والتدريب في معهد التغذية التكاملية. وهي مؤسسة Smart Food بقلم هبة أنور . تهدف إلى رفع مستوى الوعي حول تأثير الغذاء على الصحة والرفاهية العامة لجميع البشر من خلال خلق ثقافة إيجاد البدائل. وتتمثل رغبتها في تمكين كل أم بالأدوات والمعرفة اللازمة لتقديم خيارات طعام أفضل لأطفالها. تقدم هبة دورات توعية وبرامج تدريب تحولية للنساء لمساعدتهن على الوصول إلى أفضل ما لديهن ، وفهم أجسادهن وتحديد الأطعمة التي تناسبهن بشكل أفضل.
