اختيار اللانش بوكس وتجهيزه

النهاردة حابة أوضح أهمية إختيار العلبة المناسبة اللي هنحط فيها الأكل لأولادنا..هي معايير بسيطة ولكن مهمة جدا.

أول نقطة لازم يكون مكتوب على العلبة رقم ٥، وكلمة BPfree أو BP فقط ودى معناها ان البلاستيك ده آمن وخالي من الرصاص ومحقق معايير سلامة الغذاء.

تاني نقطة ياريت العلبة تكون من ماركة معروفة لأن أحيانا ييتم غش النقاط اللي ذكرتها فى بعض الماركات الغير معروفة.

نيجي بقى لمحتوى اللانش بوكس نفسه..

فيه وصفات هنا على الويب سايت كتيرة تقدروا تاخدوا منها أفكار زى (ميني بيتزا، كوكيز الشوفان، مافن الموز، ناجتس منزلية، مكرونة بالتونة) كلها هتلاقوها بالمقادير والطريقة بالتفصيل.

لكن بالنسبة للفكرة الرئيسية ضروري يوميا نحط ليهم حاجات مغذية تمدهم بالطاقة زي (المكسرات، الفاكهة، الخضروات)

يفضل طبعا لو هتحطي لأولادك ساندويتشات زى الجبن والبيض تبقي عارفة إنه هياكلها خلال أربع ساعات من ساعة تحضيرها لأن قانون سلامة الغذاء العالمى يحذر من وضع الأكل خارج الثلاجة بدرجة حرارة الغرفة لمدة أكتر من أربع ساعات وإلا هتبدأ البكتيريا بالانتشار في الأكل وتبتدي تعمل مشاكل لاقدر الله بالجهاز الهضمي.

ربنا يحفظ أولادنا جميعا

وكل سنة وأنتم طيبين