الحياة الزوجية

إنتى نعم الزوجة لو… الجزء ٢

 

3069203

إنتى نعم الزوجة لو… الجزء ٢

بتعرفى تعوضى زوجك عن تعبه لما يرجع من شغله  وبتهتمى بيه وبتكونى له السكن بعد تعب اليوم.

إن زوجك بيحب يوم أجازته عشان بيقضيه معاكى ومع الأولاد وبيحب قعدتكوا ولعبكوا وكلامكوا مع بعض وبيحب إهتمامك بيه وكل اللى بتعمليه له عشان تفرحيه يوم أجازته.

إنك بتعرفى تتحكمى في أعصابك وقت الغضب وتسيطرى على إنفعالاتك وتصرفاتك وبعد ما تهدى إنتى وزوجك تتكلموا وتحلوا المشكلة.

بتقدرى تعب زوجك في شغله وبتحاولى تشاركيه تعبه وتسأليه لو تقدرى تساعديه وتحاولى تسمعى منه وتقولى له كلام يهون عليه التعب.

مش بتحسسى زوجك بالتقصير لما يتأخر في شغله ومش بتقولى له: “المفروض تقضى معانا وقت أكتر من كده” حسسيه بأهميته وحبك له وقولى له: “بنحب وجودك معانا وقت أطول من كده.

بتعرفى تقسمى وقتك بالطريقة الصح ويكون زوجك هو أولى أولوياتك بس يبقى عندك حاجات تانية مهمة ومفيدة بتعمليها في يومك وبتعرفى تشغلى نفسك بدل من وجود فراغ في حياتك.

إنتى إللى بتفكرى جوزك كل مرة بزيارة أهله وتروحى معاه تزوريهم وتوديهم وتشجعيه أنه يبر أهله.

زوجك متضايق تدى له كل الانتباه وتطبطبى عليه وتقولى له بحنان: “إحكى لى” وماتقاطعيهوش وتقولى له: ” إنت غلطان في دى… كان المفروض…” إسمعى للنهاية باهتمام ولما يخلص أحضنيه وقولى له: “يا حبيبى شايل كتير قوى… أنا عارفة إنك قدها وقدود”.

عرفتى إن الإهمال هو مفتاح التعاسة الزوجية، ولما زوجك يحتاجك لازم يلاقيكى جنبه عشان لو ملاقكيش جنبه الموقف بيعدى بس إحساسه مش بيعدى أبداً.

 

إقرئى أيضاً:

Facebook Comments

هويده الدمرداش

هويدا الدمرداش مستشارة العلاقات الأسرية ومؤسسة علاقات البنج بونج.

زر الذهاب إلى الأعلى