الأمومةمذكرات أم

إشحني طاقتك!

 

 إشحني طاقتك!

فيه مثل بيقول الفنجان الفاضي ماينفعش تدى منه حاجة يعني لو إنتي فاضية مش هينفع تدي بيتك وعيلتك كويس! أيوه زي ما قريتي كدا طيب يعني إيه فاضية؟ دي قصة طويلة بس مهم تعرفيها لو نفسك تبقي أحسن في بيتك وتبقي راضية عن نفسك أكتر. كل واحدة فينا عندها بطارية محتاجة تتشحن يوميا ولو ما تشحنتش ماتزعليش لما تهنجي أو تتعبي أو تفصلي أو تحسي إنك مش قادرة تعملي المطلوب منك. معظمنا بيشتكي من العصبية و الضغوط وكلنا حاسين إننا محتاجين نبقي أحسن في البيت لكن بنشتكي بس مش بنحاول نواجه نفسنا ولا بنشتغل علي مشاكلنا. يوم بيجر يوم ومفيش حاجة بتتغير غير طاقتنا اللي عمالة تقل وعصبيتنا اللي عمالة تزيد. كتير أمهات تقولي أصل العيال أول ما بيناموا أنا ببقي علي آخري وبنام. هو دا أكبر غلط إنك من ساعة ما تفتحي عينك لحد ما تنامي وإنتي في مهمة رسمية ووراكي مهام و طلبات مبتخلصش و نايمة قايمة عليها. طيب نعمل إيه؟
ننظم وقتنا دي حاجة أساسية، وهفضل أقولها لحد ما أسمع منكوا إنكوا بجد شغالين علي الموضوع دا علشان دا أساسي . لما ننظم وقتنا دا هينعكس كويس جدا علي طاقتنا وعلي أعصابنا وعلي ولادنا. كمان اليوم المنظم بيبقي أريح ومش مُجهد زي اليوم المهرجل.

نظمنا وقتنا؟ حلو بعد كده نيجي لنوم ولادنا. أحلي حاجة أيام المدرسة إنه بيكون فيه إلتزام ونوم مش متأخر أوي، حاولوا تشجعوا ولادكوا علي النوم بدري حتي في الأجازة. خلونا متحضرين زي بره، صيف شتا فيه نظام وإلتزام علي الأقل وهما صغيرين وإحنا لسه قادرين عليهم

نظمنا وقتنا والولاد ناموا بدري شوية، إشحني طاقتك بقي! إحرصي علي وقت لنفسك كل يوم مهما كان قليل. حتى لو نص ساعة كل يوم هتفرق جدا.

إعملي حاجة بتحبيها، إعملي حاجة بتديكي طاقة. فيه ناس الرياضة بتغير مودها، فيه ناس بتحب تكتب زي حالاتي، فيه ناس بتحب تقرا، فيه ناس فنجان قهوة يعملها أحلي دماغ، فيه ناس لو عملت حاجة بإيديها بتستمتع جدا، الأمثلة ملهاش أول من آخر.

إنتي عارفة نفسك و فاهمة إحتياجاتك فحاولي تشحني كل ما تقدري علشان فنجانك مايبقاش فاضي. الساعة دي هتحسسك إنك لسه عايشة لروحك، لسه بتعملي حاجات بتحبيها، حياتك لسه ملكك، فبالتالي مش هتكوني ناقمة علي ولادك و عصبيتك هتقل و هتتفاجئي من الطاقة اللي هتبقي عندك للبيت والولاد، فهمتي ولا نقول كمان؟

Facebook Comments

ديانا فريد

ديانا هي زوجة وأم لطفل توأم مستوحاة من الموسيقى والطبيعة والتفاعلات اليومية في الحياة. تستخدم شغفها بالكتابة لالتقاط اللحظات الخاصة واستبدال الضحك بالألم وإلهام الآخرين. كاتبة طويلة في العديد من المنشورات في مصر والخليج. من خلال Twin Mummy’s Diary تشارك أفكارها وخبراتها ونصائح مفيدة أثناء انتقالها نحن من خلال ركوب الأفعوانية تسمى الأمومة ، مع تحدياتها وأفراحها.

زر الذهاب إلى الأعلى