التربيةبعد الخمس سنوات

إزاى نعلم أولادنا الأمانة

 

?????????????????????????????????????????????????????????????????????????????????????????????????????????

إزاى نعلم أولادنا الأمانة

 

الأمانة .. ده خلق وجودى، عشان أولادنا يعيشوا كويس لازم يتحلوا بيه.. تعريفه فى حاجتين: اننا نرجع الحاجة لاصحابها والمعنى الأعم : الصدق اللى بيزرع الثقة فى العلاقات ويحقق نزاهة حقيقة التحدى الحقيقى في الأمانة ان الأطفال بيلمسوا عكس ده فى الأطفال اللى حواليهم عشان كده دور البيت مهم جدا لتعزيز الخلق ده.

بوجه عام فيه حاجات تتعمل لكل الأعمار.. 
أولاً: ألتزمى الصدق التام والوضوح فى كل كلمة، وخصوصا فى اجابات الاسئلة، ولو السؤال مش عاجبك ومش عايزة تجاوبيه اعتذرى للطفل عن الاجابة عنه مع توضيح السبب ، متحاوليش تخرجى من الموقف بأى إجابة مترضيش فضوله.. ممكن تأجلى الرد عليه لوقت تانى تكونى فكرتى فى إجابة صادقة ومرضية. 
ثانياً: أبدا متقوليش أى كدبة “بيضا” قدام الطفل. 
ثالثاً: ابعدى عن المبالغة فى ترجمة المواقف والتصرفات اللي حواليكى، عشان يتعلم يدى الحاجة حجمها. 
رابعاً: متهدديش بعقاب انتى عارفة انه مش هيحصل او تخوفيه بحاجة مش منطقية زى الكلب هيعضك، هوديك تاخد حقنة في مواقف ده مش هيحصل فيها.
 خامساً: متتصيديش أولادك وهم بيكدبوا، لو لقيتيه بيكدب قوليله خد دقيقة فكر تانى فى اللى حصل واحكيلى؛ وانت عارف الصدق مهم ازاى… وخدى بالك نظرة عينك ونغمة صوتك بتوصل شكك اكتر من كلامك، فحاولى تسيطرى على نفسك..
ولما تلاقى طفلك بيقول الحقيقة متتردديش تمدحى ده وبشدة وتأكدى انه عند حسن ظنك وإنه لازم يكون فخور بنفسه دلوقتى ..

عشان نعلم تعريف الأمانة للأطفال الصغيرة، اللي عمرها ما بين 4ل 7 سنين نقدر نلعب لعبة معاهم… اقعدى مع الاطفال وقوليلهم انا هسألكم اسئلة وجاوبونى بكلمة حقيقى أو مش حقيقى.. وابتدى اسأليهم اسلئلة بسيطة.. السما لونها ازرق ، وهم يردوا حقيقى.. شاورى على ايدك وقولى دى رجلى… مش حقيقى. 
بنشوف بعنينا… حقيقى. 
خدى فلوس حطيها فى جيبك وقولى ماما مخدتش فلوس… واستنى ردهم
 حطى كباية قدامك وقولى انا حطيت الكباية هنا مش فى مكانها !
وبعد اللعبة دى قوليهم انا شايفاكوا شاطرين وعارفين الحقيقى واللى مش حقيقى؛ اللى مش حقيقى ده اسمه “كذب”.. 
اكدى عليهم ان الحقيقة هى احسن حاجة حتى لما نغلط، عشان دى الحاجة اللى هتخلينا نتعلم ونكون أحسن..
ومتنسيش.. كل مرة تلاقى ابنك بيقول الحقيقة تكافئيه معنويا اكتر من اى مكافأة تانى، ولما يغلط ويعترف بغلطه خلى عواقب الغلط أقل بكتير من تهليلك بأنه قال الحقيقة حتى في وقت كان غلطان فيه… احضنيه وفكريه انك فخورة بيه.. 
لعبة تانية ممكن نسميها “عرف مشاعرك”جيبى صور لناس كتير فرحانة وزعلانة وبتعيط وبتضحك وغضبانة وهادية ومشاعرها باينة على وشها.. اقعدى مع اولادك وإسأليهم.. تفتكروا دى حاسة بأيه؟ 
ايه اللى ممكن يكون حسسها بكده؟ 
وفى كل صورة افهمى منهم : هو ممكن حد يحس بكده عادى؟ 
بعد شوية هيتعلموا ازاى يعبروا بصدق عن مشاعرهم، ميتكسفوش منها ويعرفوا انها حاجة عادية..

الأطفال من 7 ل 14 سنة فاهمين يعنى ايه أمانة بس بيواجهوا صعوبة فى فهم العواقب وإلتزام الصدق فى كل موقف، ودورنا هنا اننا نثبتهم وندعمهم.. ممكن تبتدى باجتماع عائلى في يوم أجازة تتقفوا فيه إن الشهر الجاى كله هنركز فيه على خلق الأمانة ، نوعد بعض بالالتزام التام بالصدق طول الشهر ده .. تركيز شهر على حاجة واحدة مفعولها سحرى.. اللعبة المرة دى لعبة عواقب.. اختارى مواقف مختلفة، واتكلمى معاهم عن العواقب قصيرة المدى للا أمانة وطويلة المدى.. مثلا لو حد راح يشترى حاجة والبياع غلط في الحساب ورجعله 20 جنيه زيادة؛ اشترى بيهم جرس للعجلة بتاعته ؛ وهو ماشي بالعجلة كان فرحان عشان اشترى اللى نفسه فيه، بس حس بالزعل عشان ممكن البياع ده يدفعهم من جيبه، وزعل إنه مكنش أمين وكل ما كان يشوف الجرس يحس بالندم…. أو إنه فى نفس الموقف ده اختار يرجع الفلوس للبياع اللي شكره على أمانته ، ولما ركب العجلة زعل على الفرصة اللي ضيعها ؛ بس حس بالفخر أنه كان أمين..
اختارى مواقف كتير، اذية جيرانه، غش في امتحان، خناقة مع اخواته…. كل مرة ركزى على احساس الطفل والعواقب بتاعة اختياراته.. 
ارجعي اسأليهم :ولو حد اختار السلوك الغير الأمين ممكن يعمل ايه عشان يغير ندمه؟ فكريهم بالفرصة التانية المتمثلة فى الاستغفار والاعتذار او ترجيع الفلوس فى المثل بتاعنا .. ومتنسيش تفكريه ان احساسه هيكون صعب وهو بيعتذر بس هيفرح أوى بنفسه وهتفرحى بيه..

Facebook Comments

منال رستم

منال رستم هي مدربة الانضباط الإيجابي المعتمدة ومعلمة منتسوري معتمدة للأعمار من 2.5 إلى 6 سنوات. لديها أكثر من 5 سنوات من الخبرة في تقديم المشورة للآباء فيما يتعلق بقضايا الأبوة والأمومة. تعمل في الغالب مع جمهور ناطق باللغة العربية وجهًا لوجه

زر الذهاب إلى الأعلى