إزاى نتعامل مع الطفل الخجول
إبنك خجول؟ ما بيرضاش يسلم؟ بيكش من الناس اللي ما يعرفهومش؟ بيختار يقعد جنبك بدل ما يقوم يلعب مع الأطفال اللي من سنه؟ دي صفة سببها حرصه على نفسه وعلى مشاعره. الإنسان الخجول إنسان جميل. نادرا ما يؤذي حد. بيفكر قبل ما يتكلم أو يتصرف. إنسان مريح. عشرته ممتعة. لو ضغطتي على إبنك خجله هيزيد لإن هيزيد عليه التوتر.
لو عايزة تساعديه، شجعيه ياخد خطوات بسيطة. ممكن يبدأ يتدرب على إنه يبتسم للناس بدل ما يسلم بالإيد. يعزم بحاجة حلوة على طفل واحد، بدل ما يعزم على أطفال كتير.
لو هتروحوا مكان فيه ناس كتير، قوليله على اللي هيحصل عشان ما يتفاجئش، واسمحيله يبقى قريب منك. قوليله “أنا عارفة انك هتحب تبقى جنبي، وأنا ما عنديش مانع… خليك جنبي. ولما اقول لك سلم على حد، سلم عليه بسرعة وتعال جري في حضني”. دربي إبنك بالتدريج على إنه يدي الفلوس للبياع، يرد ع التليفون، يطلب أكله في المطعم، وأهم من كل ده تقبلي انه خجول وان ده طبعه وإنه طبع جميل كمان. إتكلمي عن خجله إنه حاجة حلوة وقولي ده بطريقة إيجابية عشان تزودي ثقته في نفسه. يعني مثلا لو حد قال لك “….. بيتكسف” قولي “هو بيحب يعرف الناس كويس قبل ما يتصاحب عليهم.” وبكده ومع الوقت هيقل خجله ويقدر يتفاعل مع الناس.
منال رستم هي مدربة الانضباط الإيجابي المعتمدة ومعلمة منتسوري معتمدة للأعمار من 2.5 إلى 6 سنوات. لديها أكثر من 5 سنوات من الخبرة في تقديم المشورة للآباء فيما يتعلق بقضايا الأبوة والأمومة. تعمل في الغالب مع جمهور ناطق باللغة العربية وجهًا لوجه
