إزاى نتعامل مع الطفل الفاقد الثقة فى نفسه
الطفل الواثق في نفسه هو اللي شايف نفسه كويس ومصدق انه يستحق يبقى عنده أصدقاء، ومصدق ان الناس بتحبه. الطفل الواثق في نفسه بيقدر يختلط بالأطفال الآخرين بالطريقة المناسبة، لإنه متصالح مع نفسه. أما الطفل فاقد الثقة بيتصرف بعنف وعند ومقاومة. وممكن يتجنب مخالطة الأطفال أصلا. الطفل اللي ما عندوش ثقة في نفسه ما بياخدش باله من نفسه. ما بيهتمش بنظافته أو مظهره. ببساطة لإنه مش فارق معاه. يلبس حلو يلبس وحش، هو شايف نفسه ما يفرقش. زي ما يكون بيستخبى ورا التصرفات الوحشة عشان يلاقي سبب لعدم حب الناس ليه، عشان يرتاح. ومش لازم نتلخبط بينه وبين الطفل الخجول. لإن ممكن يكون الطفل خجول لكن واثق في نفسه.
عشان نساعد طفل يستعيد ثقته في نفسه محتاجين:
ـ نركز على نقط قوته وبس. ونعلق عليها بدون مبالغة. بصدق وبس.
ـ لما نلاقيه اتصرف بطريقة غلط، نستوعبه ونطمنه إن الغلطة دي مش هتأثر على حبنا ليه.
ـ ناخد رأيه في كل حاجة نقدر عليها. مش بس في أموره هو، وإنما في أمورنا إحنا كمان.
ـ ننفذ آراءه لو كانت حلوة.
ـ نمنع النقد خالص، ونستبدله بحوار ودود وراقي.
ـ نشجعه يوصف نفسه والحاجات اللي بيعرف يعملها. ونلفت نظره كل ما يكتسب مهارة جديدة.
ـ نركز على الحاجات اللي بيتعلمها ويتقنها أكتر من الحاجات اللي لسه ما اتعلمهاش أو مش عارف يتقنها.
ـ نتكلم عنه كويس وما ننتقدوش ولا نحرجه قدام حد.
ـ نتجنب اننا نقارنه بأي حد.
ـ نشجعه يجرب حاجات جديدة ويروح أماكن جديدة.
ـ نديه فرصة يستكشف ويعلم نفسه.
ـ نعلمه المهارات الاجتماعية الأساسية. إزاي يسلم، ياكل بالشوكة والسكينة، يسأل على حاجة، يسأل على حد، يقدم هدية، يقبل هدية. يرحب بضيوفه….إلخ.
كل دي حاجات بتزود الثقة في النفس. والثقة في النفس أساس السعادة والنجاح.
منال رستم هي مدربة الانضباط الإيجابي المعتمدة ومعلمة منتسوري معتمدة للأعمار من 2.5 إلى 6 سنوات. لديها أكثر من 5 سنوات من الخبرة في تقديم المشورة للآباء فيما يتعلق بقضايا الأبوة والأمومة. تعمل في الغالب مع جمهور ناطق باللغة العربية وجهًا لوجه
