إزاى تحمي صحتك النفسية من ضغط متطلبات الآخرين؟
إزاى تحمي صحتك النفسية من ضغط متطلبات الآخرين؟
العطاء والرعاية ممكن يكونوا جزء من طبيعتنا لكن أحيانا توقعات الآخرين مننا ممكن تفوق قدراتنا وتمنعنا من الإنتباه لإحتياجاتنا ورعاية نفسنا.
لازم تعرفى إن صحتك النفسية كأم مهمة علشان تقدرى تكملى في تلبية احتياجات الآخرين بحب.
علي سبيل المثال لما بيكون عندنا اطفال صغيرين معتمدين علينا في تلبية احتياجاتهم الأساسية بيكون صعب علينا نحافظ على مساحتنا الشخصية. بس بتكون فيه مواقف مع آخرين ممكن تتقل علينا في المرحلة دى زى إن يطالبنا الأهل أو الأصدقاء بحاجات ممكن تحتاج مننا لوقت أو مجهود بدني أو نفسي.
وساعات بيكون عندنا قلق من الاعتذار عن تلبية الطلبات دى وبنخاف يعتبرونا أنانيين أو مقصرين وبنبقى حاسين إننا مش هنعرف نتعامل مع ردود أفعال الآخرين.
مبدئيا لازم تكونى عارفة إيه هى مساحتك الشخصية وتبدأي تحطى حدود لحمايتها.
خليكى عارفة ان انتي مش مسئولة عن اللى هيحسه الآخرين، بالتالى انتى مش محتاجى تخلقي أعذار مش حقيقية لو مش قادرة تعملى اللى بيطلبوه منك. انتي مسئولة عن مشاعرك وأفكارك وتصرفاتك وبس، وكمان من حقك تقدمي المساعدة بكامل رغبتك بود وحب وبدون ضغط أو احساس إنه فرض عليكى.
ودا بينطبق كمان على التعامل مع الزملاء في العمل زى مثلا طلب اتصال على التليفون الشخصي و تحديد الأوقات المقبولة بالنسبالك.
حافظي على صحتك النفسية وإدى أولوية لرعاية ذاتك حسب الظروف والمتغيرات واحمي نفسك من الإحساس بالذنب أو التقصير عن طريق التواصل الفعال مع الآخرين لتوضيح حدودك.
ايه مستشارة علم نفس مجتمعي متخصصة في تقييم الاحتياجات و تنمية الكفاءات باستخدام أسس علمية و خبرة أكثر من ٢٠ عاما في مجال التعليم و التدريب و الارشاد النفسي بهدف تقليل الخلافات داخل المؤسسات و تطوير العلاقات الأسرية و الصحة النفسية للاهل و المراهقين.
حصلت ايه على درجتي البكالوريوس و الماجستير من الجامعة الامريكية بالقاهرة و هى عضو بالمنظمة البريطانية لعلم النفس و منظمة الابحاث التطبيقية المجتمعية بالولايات المتحدة الأمريكية و المؤسسة البريطانية لتنمية الافراد. كما أنها مدرب معتمد لبرامج الفاعلية و الممثل المعتمد لمؤسسة جوردن العالمية ، و مرشد معتمد من جامعة كامبردج بانجلترا. شاركت ايه في تاسيس جمعية أصدقاء الام و الطفل و هى عضو مجلس إدارة بها و بمؤسسة شبكة خبراء الأسرة إلى جانب تطوعها لاستشارة عدد من الجمعيات الأهلية.
