الشهور الأولى للمولودبعد الولادةفترة الحملمذكرات أم

أم التوأم: قصة كفاح مش هتفهمها إلا أم التوأم اللى زيها

 

6577-000056

أم التوأم: قصة كفاح مش هتفهمها إلا أم التوأم اللى زيها

هتقولي لي طيب ما الأم اللي الفرق بين عيالها صغير زي أم التوأم بالظبط. لا يا حبيبتي، مش زيها خالص. أم التوأم بتبدأ رحلة العذاب من الحمل لأنه بيبقي فيه مشاكل رهيبة وتعب من نوع مختلف…

ثانيا من أول لحظة كل حاجة بتتعمل بتتضرب في إتنين، يعني نوم، أكل، شرب، تغيير، شاور، قلق، زن، عياط، عيا، مشاكل من أي نوع إضربي في اتنين. مفيش يوم هيعدي سلس لأن حتى لو واحد كويس، غالبا التاني لأ. مفيش يوم هتاخدي نفسك فيه لأنهم في مسابقة مين يحتاجك أكتر. مفيش يوم هتقدري تسيبيهم بسهولة لأي حد لأن مش هتلاقي ناس كتير تتطوع تاخد بالها من الإتنين. مفيش مرة هتصحي حاسة إنك شبعتي نوم لأنك مجهدة فوق الوصف. على طول عندك صراع مع الوقت علشان كل حاجة دوبل. دايما في تحدي توفقي بين الإتنين علشان هما حساسين جدا من الناحية دي.

المهم علشان مطولش عليكوا، إوعوا تقولوا لأم التوأم كلمات زي “ما أنا عارفة” أو “ما أنا فاهمة” أو “إنتي هتقولي لي” لأن إنتي ولا عارفة ولا فاهمة ولا عمرك هتعرفي غير لما تخوضي التجربة. نعمة كبيرة جدا بس مسؤلية فوق الوصف…

أم التوأم ما اتعلمتش مع طفل وكسبت خبرة واتوتكت فلما التاني جه كانت خبرة بقى وسريعة ومتمرسة. أم التوأم من أول يوم محتاجة كل يوم تتعلم حاجة جديدة وبسرعة وتعملها كويس مع اتنين مش واحد. أم التوأم معندهاش الرفاهية إنها تركز مع طفل وتستمتع بيه أساسا ودي حاجة وجعتني في تجربتي كأم إني دايما كنت مشغولة باللي ورايا ومهمومة بالتفاصيل اليومية والروتين اليومي أكتر من إستمتاعي بيهم. مش فاكرة إني أول سنتين أخدت واحد في حضني وقعدت أدلعه أو إني قضيت كام ساعة قاعدة مركزة مع واحد فيهم. دي من عيوب إنك تبقي أم توأم، علشان كدة المقارنة مش في صالحك.

أنا مش بقلل من أي أم لأن الأمومة صعبة ومجهدة جدا بس هي الفكرة إن أم التوأم قصة أصعب وجهد أكتر من مضاعف

Facebook Comments

ديانا فريد

ديانا هي زوجة وأم لطفل توأم مستوحاة من الموسيقى والطبيعة والتفاعلات اليومية في الحياة. تستخدم شغفها بالكتابة لالتقاط اللحظات الخاصة واستبدال الضحك بالألم وإلهام الآخرين. كاتبة طويلة في العديد من المنشورات في مصر والخليج. من خلال Twin Mummy’s Diary تشارك أفكارها وخبراتها ونصائح مفيدة أثناء انتقالها نحن من خلال ركوب الأفعوانية تسمى الأمومة ، مع تحدياتها وأفراحها.

زر الذهاب إلى الأعلى