أفكارى ملخبطة!
عملى إيه لو أفكارك فى عقلك شخابيط فى بعض متشابكة؟
جربي الخطوات دى:
الخطوة الأولى: التفريغ
فرغى واكتبى كل اللى يجى فى بالك على ورق وبلاش تقرأيه فى وقتها.
مثال : نقاط عن كل اللى فى حياتك زى شغلك، علاقتك بزوجك، أولادك، مشاكل مع أولادك، أصحابك، جيرانك، ترتيب بيتك.
الخطوة التانية : الفصل
افصلى عقلك بعمل أى نشاط تحبيه يعنى مثلا اتفرجى على فيلم أو اخرجى أو اقرأى قصة أو ارقصى زومبا.
الخطوة التالتة : الميزان
تانى يوم إقرأى و اوزنى اللى كتبتيه وابدأى رتبى أفكارك من المهم للأقل أهمية وقسميهم فى أربع خانات
مهم وعاجل، مهم وغير عاجل، غير مهم وعاجل، غير مهم وغير عاجل
الخطوة الرابعة : الغوص
اختارى فكرة واحدة من اللى كتبتيه فى قائمة الأولويات وابدأى بالعاجل وخلى الغير مهم و غير عاجل فى اخر القائمة واكتبى الفكرة اللى اخترتيها تانى فى ورقة بيضا وغوصى فى تفاصيلها واكتبى تحتها كل الحلول الممكنة.
مثال: اخترتى من اللى فات فكرة انك عايزة تغيرى التلاجة لأنها بقت عاملة مشاكل
اكتبى تحتها : هروح اتفرج على تلاجات فى المحل الفلانى، هتفرج اونلاين، هسأل أصحابى، هعرض القديمة للبيع، هسحب فلوس
الخطوة الخامسة : الإنطلاق
دى مرحلة التنفيذ للحاجة اللى اخترتى تبدأى بيها يعنى ابتدى اتحركى فى الخطوات اللى حطتيها ومتأجليش.
ولما تخلصى مهمة ادخلى على اللى بعدها وافرحى بإنجازك.
ريهام سمير مستشارة مهنية في التعلم وتنمية المهارات الشخصية. ريهام أخصائية معتمدة في عسر القراءة من مركز بلاكفورد – لندن وعضو في جمعية عسر القراءة البريطانية. وهي مُعلمة معتمدة للانضباط الإيجابي في الفصل الدراسي من الرابطة الدولية للانضباط الإيجابي في الولايات المتحدة الأمريكية ، ومُنسِّقة معتمدة في اللغة الإنجليزية في TEFL وممارس معتمد في البرمجة اللغوية العصبية من المجلس الأمريكي للغة البرمجة اللغوية العصبية. تطبق ريهام تقنيات التعلم والتعليم الخصوصية الأكثر تقدمًا لخدمة أنواع عديدة من العملاء من مختلف الأعمار والأنظمة التعليمية.
