أعراض الحمل الغريبة!
من خلال المقال ده هنوضحلك 10 أعراض غريبة للحمل
1. ألم بالمهبل وضغط جامد في الحوض أو (نغزة) ودا بيزيد في نهاية الحمل وبيكون بسبب كبر رأس البيبي ونزولها لتحت مسببة ضغط على الحوض والأعصاب المحيطة.
التمارين الرياضية وخاصة السباحة واليوجا وتمارين التوازان بتكون مفيدة أوي وبتقلل الألم .
2. الميل لأكل حاجات عجيبة زي الثلج ، معجون الأسنان، بياض الحوائط والمناديل الورقية ودا بيكون لأسباب غير معروفة بس المختصين بيرجحوا إنه بيكون بسبب نقص فيتامينات ومعادن وعلشان كده استشيري طبيبك علشان يكتبلك فيتامينات?.
3. سيلان الأنف بيكون نتيجة زيادة تدفق الدم للأغشية المخاطية فممكن تستخدمي محلول ملحي كغسول للأنف واستشيري طبيبك علشان يكتبلك بخاخات ترطيب الأنف.
4. افرازات الثدي ودي مفيش منها قلق إلا لو كان لونها وردي أو فيها دم.
5. زيادة أو نقص الرغبة في العلاقة الزوجية ودا بيبقى بسبب تدفق الهرمونات وعموما العلاقة الزوجية أثناء الحمل أمنة طالما حملك مستقر وطبيبك لم يحذرك منها.
6. التهابات ونزيف اللثة فياريت تهتمى بصحة ونظافة أسنانك وتحرصى على استخدام الفرشاة والمعجون وغسول الأسنان .
7. الغثيان الصباحي ودا كتير من الحوامل بيشعروا بيه طول اليوم مش الصبح بس وبيكون بسبب تدفق هرمون HCG وتقدرى تتغلبي على الإحساس دا بانك تاكلي وجبات صغيرة كتيرة خلال اليوم وكمان البقسماط حل سحري للغثيان بس خلي بالك لو فضلتي أكتر من 24 ساعة من غير أكل روحي المستشفى واطلبي المساعدة.
8.موجات من العواطف المختلطة يعنى تبقي فرحانة ومرة واحدة زعلانة وتعيطى.
اطلبي الدعم والمساعدة من جوزك وأهلك علشان تعدي رحلة الحمل بسعادة وسلام.
9. الامساك ودا بردو بسبب الهرمونات اللي بتعمل ارتخاء للعضلات وبطء حركة الامعاء وكمان فيتامينات الحمل زي الحديد بيسبب الامساك.
الفواكه والخضروات وشرب المياه من 10-12 كوباية يوميا مع التمارين الرياضية بتقلل الامساك.
10. زيادة اللعاب ودا نتيجة الغثيان والقئ واللبان بيقلل الموضوع شوية بس متقلقيش دا بيبقي في أول 3 شهور بس وبيختفي بعد كدا
استشارى النساء والتوليد – مركز الأسكندرية الإقليمى لصحة وتنمية المرأة
